ಕೆವಿಜಿ ನರ್ಸಿಂಗ್ ಸಂಸ್ಥೆಯಲ್ಲಿ ಜುಲೈ ೨೪ರಂದು ಅಂತರರಾಷ್ಟ್ರೀಯ ಸ್ವಯಂ ಆರೈಕೆ ದಿನವನ್ನು ಆಚರಿಸಲಾಯಿತು.
ಅಕಾಡೆಮಿ ಆಫ್ ಲಿಬರಲ್ ಎಜ್ಯುಕೇಶನ್ನ ಅಧ್ಯಕ್ಷ ಡಾ. ಕೆ.ವಿ. ಚಿದಾನಂದ, ಅಧ್ಯಕ್ಷರು, ಅಧ್ಯಕ್ಷತೆ ವಹಿಸಿದ್ದು, ಶಿಸ್ತಿನ ಮಹತ್ವ ಮತ್ತು ಸ್ವಯಂ ಆರೈಕೆ ವ್ಯಕ್ತಿಯ ಯಶಸ್ವಿ ಹಾಗೂ ಪರಿಪೂರ್ಣ ಜೀವನದಲ್ಲಿ ಯಾವ ರೀತಿಯ ಪಾತ್ರ ವಹಿಸುತ್ತದೆ ಎಂಬುದರ ಬಗ್ಗೆ ಮಾತನಾಡಿದರು.
ಕೆವಿಜಿ ಮೆಡಿಕಲ್ ಕಾಲೇಜು ಮತ್ತು ಆಸ್ಪತ್ರೆ ಡೀನ್ ಡಾ. ನೀಲಾಂಬಿಕೈ ನಟರಾಜನ್ ಮುಖ್ಯ ಅತಿಥಿಯಾಗಿ ಭಾಗವಹಿಸಿ ಮಾತನಾಡಿ, ಸ್ವಯಂ ಆರೈಕೆಯು ದಿನನಿತ್ಯದ ಹೊಣೆಗಾರಿಕೆ ಎಂಬುದನ್ನು ಒತ್ತಿ ಹೇಳಿ, ತಮ್ಮ ಆರೈಕೆ ಮಾಡುವುದು ಎಂದೆಂದಿಗೂ ಮುಖ್ಯವಾದದ್ದು ಎಂದು ಹೇಳಿದರು.
ಅತಿಥಿ ಭಾಷಣಗಾರರಾಗಿದ್ದ ಕೆವಿಜಿ ಮೆಡಿಕಲ್ ಕಾಲೇಜು ಮತ್ತು ಆಸ್ಪತ್ರೆಯ ಅನಾಟಮಿ ವಿಭಾಗದ ಸಹ ಪ್ರಾಧ್ಯಾಪಕ ಡಾ. ಅಲ್ವಿನ್ ಜೋಷುವಾ ಎಸ್. ಅವರು “ಪ್ರತಿ ಪ್ರಯಾಣವನ್ನೂ ಆಚರಿಸೋಣ” ಎಂಬ ವಿಷಯದ ಕುರಿತು ಪ್ರೇರಣಾದಾಯಕವಾದ ಭಾಷಣ ನೀಡಿದರು. ಕುವೆಂಪು ಅವರ ‘ಬದುಕಲು ಕಲಿಯಿರಿ’ ಎಂಬ ಸಂದೇಶವನ್ನು ಉಲ್ಲೇಖಿಸಿ ವಿದ್ಯಾರ್ಥಿಗಳು ವೈಯಕ್ತಿಕ ಮತ್ತು ವೃತ್ತಿಪರ ಜೀವನದಲ್ಲಿ ಸ್ವಯಂ ಆರೈಕೆಯನ್ನು ಅಳವಡಿಸಿಕೊಳ್ಳಬೇಕೆಂದು ಪ್ರೋತ್ಸಾಹಿಸಿದರು.
ವಿದ್ಯಾರ್ಥಿಗಳಿಂದ ಸ್ವಯಂ ಆರೈಕೆಯ ಮಹತ್ವವನ್ನು ಸೃಜನಾತ್ಮಕವಾಗಿ ಪ್ರಸ್ತುತಪಡಿಸುವ ನಾಟಕ ಪ್ರದರ್ಶಿಸಲಾಯಿತು. ಇದಕ್ಕೂ ನಂತರ ನರ್ಸಿಂಗ್ ಮತ್ತು ಸಹ ಸಂಸ್ಥೆಗಳ ವಿದ್ಯಾರ್ಥಿಗಳಿಗಾಗಿ ಆಯೋಜಿಸಲಾಗಿದ್ದ ವಿಷಯಾಧಾರಿತ ಪೋಸ್ಟರ್ ಸ್ಪರ್ಧೆಯ ವಿಜೇತರಿಗೆ ಬಹುಮಾನ ವಿತರಣೆ ಕಾರ್ಯಕ್ರಮ ನಡೆಯಿತು.
ಕಾರ್ಯಕ್ರಮದಲ್ಲಿ ಡಾ. ಪ್ರಮೋದ್ ಕೆ.ಜೆ., ಪ್ರಾಂಶುಪಾಲರು, ಕೆವಿಜಿ ಇನ್ಸ್ಟಿಟ್ಯೂಟ್ ಆಫ್ ನರ್ಸಿಂಗ್ ಸೈನ್ಸಸ್, ಶ್ರೀಮತಿ ಚಂದ್ರಾವತಿ ಕೆ.ಎಸ್., ಪ್ರಾಂಶುಪಾಲರು, ಕೆವಿಜಿ ಇನ್ಸ್ಟಿಟ್ಯೂಟ್ ಆಫ್ ನರ್ಸಿಂಗ್, ಉಪನ್ಯಾಸಕರು, ಬೋಧಕೇತರ ಸಿಬ್ಬಂದಿ ಮತ್ತು ವಿದ್ಯಾರ್ಥಿಗಳು ಭಾಗವಹಿಸಿದರು.
ವಿದ್ಯಾರ್ಥಿ ಸಂಘದ ಸಲಹೆಗಾರರಾದ ಉಪನ್ಯಾಸಕಿ ಲವೀನ ಕೆ. ಎ. ಸಹಕರಿಸಿದರು. ಕುಮಾರಿ ಫಿಲೋಮಿನಾ ಸಿರಿಯಾ ಸ್ವಾಗತಿಸಿದರು. ಮತ್ತು ಕು.ಮಾಳವಿಕಾ ಕೆ. ಕಾರ್ಯಕ್ರಮ ನಿರೂಪಿಸಿ ವಂದಿಸಿದರು.
