ಹದಗೆಟ್ಟ ರಸ್ತೆಯಲ್ಲಿ ಸಾರ್ವಜನಿಕರ ಅನಿವಾರ್ಯ ಸಂಚಾರ
ರಿಕ್ಷಾ ,ಆಂಬ್ಯುಲೆನ್ಸ್ ಸಂಚಾರಕ್ಕೂ ಸಂಚಕಾರ
ಬೆಳ್ಳಾರೆ ಸರಕಾರಿ ಆಸ್ಪತ್ರೆಗೆ ಹೋಗುವ ರಸ್ತೆ ಹೊಂಡ ಗುಂಡಿಗಳಿಂದ ಕೂಡಿದ್ದು ವಾಹನ ಸಂಚಾರಕ್ಕೆ ತೊಂದರೆಯಾಗಿದೆ.
ಬೆಳ್ಳಾರೆ ಮುಖ್ಯ ರಸ್ತೆಯಿಂದ ಗ್ರಾಮ ಪಂಚಾಯತ್ ಹಳೆಕಟ್ಟಡ ಸಮೀಪದಿಂದ ಸರಕಾರಿ ಆಸ್ಪತ್ರೆ ಕಡೆಗೆ ಹೋಗುವ ರಸ್ತೆ ತೀರಾ ಹೊಂಡಗಳಿಂದ ಕೂಡಿದ್ದು ಡಾಮರು ಕಿತ್ತು ಹೋಗಿದೆ.ಜಲ್ಲಿಕಲ್ಲುಗಳು ಮಾಯವಾಗಿದೆ.
ಅಲ್ಲಲ್ಲಿ ದೊಡ್ಡ ದೊಡ್ಡ ಗುಂಡಿಗಳು ನಿರ್ಮಾಣವಾಗಿದ್ದು ಆಂಬ್ಯುಲೆನ್ಸ್ ಸಂಚಾರಕ್ಕೂ ತೊಂದರೆಯಾಗಿದೆ.
ಅಸೌಖ್ಯಕ್ಕೊಳಗಾದವರು ರಿಕ್ಷಾ ಮಾಡಿ ಹೋಗುವ ಪರಿಸ್ಥಿತಿಯೂ ಇಲ್ಲದಂತಾಗಿದೆ.
ಇಲ್ಲಿ ಚರಂಡಿ ವ್ಯವಸ್ಥೆಯೂ ಇಲ್ಲದೆ ಮಳೆ ನೀರು ರಸ್ತೆಯಲ್ಲಿಯೇ ಹರಿಯುತ್ತಿದೆ.ಆಂಬ್ಯುಲೆನ್ಸ್ ಓಡಾಟಕ್ಕೂ ತೊಂದರೆಯಾಗಿದ್ದು ಅಸೌಖ್ಯದಿಂದ ಇರುವವರು ಆಸ್ಪತ್ರೆಗೆ ಬರಲೂ ಸಮಸ್ಯೆಯಾಗುತ್ತಿದೆ.
ಈ ರಸ್ತೆ ಮಂಡೇಪು ಮೂಡಾಯಿತೋಟ ಸಂಪರ್ಕ ರಸ್ತೆಯಾಗಿದ್ದು ನೂರಾರು ಜನರು ನಡೆದಾಡುವ ರಸ್ತೆಯೂ ಆಗಿದೆ.
ರಸ್ತೆ ಗುಂಡಿಗಳಲ್ಲಿ ಮಳೆನೀರು ನಿಂತು ರಸ್ತೆ ಕೆಸರುಮಯವಾಗಿದೆ.
ಅಸಮರ್ಪಕ ಪೈಪ್ ಲೈನ್ ಕಾಮಗಾರಿ
ರಸ್ತೆ ಬದಿ ಪೈಪ್ ಲೈನ್ ಅಳವಡಿಸಲು ಗುಂಡಿ ತೆಗೆದಿದ್ದು ಇದನ್ನು ಸರಿಯಾಗಿ ಮುಚ್ಚದೆ ಇರುವುದರಿಂದ ತೊಂದರೆಯಾಗಿದೆ.ಅಲ್ಲಲ್ಲಿ ಗುಂಡಿ ಮುಚ್ವಲು ಬಾಕಿ ಇರಿಸಿದ್ದು ಇದರಿಂದ ನಡೆದಾಡಲು ಕಷ್ಟಕರವಾಗಿದೆ.
ಜನಪ್ರತಿನಿಧಿಗಳು,ಅಧಿಕಾರಿಗಳು ಕೂಡಲೇ ಇತ್ತ ಗಮನಹರಿಸಿ ರಸ್ತೆ ದುರಸ್ಥಿಗೊಳಿಸಬೇಕೆಂದು ಸಾರ್ವಜನಿಕರು ವಿನಂತಿಸಿದ್ದಾರೆ.
