ಆಲೆಟ್ಟಿ ಗ್ರಾಮದ ಎರಡು ಕಡೆಗಳಲ್ಲಿ ಶಾಸಕರಿಂದ ಗುದ್ದಲಿ ಪೂಜೆ

ರೂ.1 ಕೋಟಿ ಅನುದಾನ ಬಿಡುಗಡೆ, ನಾಗಪಟ್ಟಣ ಸೇತುವೆ ದುರಸ್ತಿಗೆ 75 ಲಕ್ಷ ,ಆಡಿಂಜ ಸೇತುವೆಗೆ 25 ಲಕ್ಷ ಮಂಜೂರು

ಆಲೆಟ್ಟಿ ಗ್ರಾಮದ ಎರಡು ‌ಕಡೆಗಳಲ್ಲಿ ಸೇತುವೆ ಕಾಮಗಾರಿಗೆ ಶಾಸಕರ ವಿಶೇಷ ಅನುದಾನ ರೂ.1 ಕೋಟಿ ಮಂಜೂರಾಗಿದ್ದು ಇಂದು ಎರಡು ಕಡೆಗಳಲ್ಲಿ ಗುದ್ದಲಿ ಪೂಜೆಯು ನೆರವೇರಿತು.

ಆಲೆಟ್ಟಿ ನಾಗಪಟ್ಟಣ ಪಯಸ್ವಿನಿ ನದಿಯ ಸೇತುವೆಯ‌ ದುರಸ್ತಿ ಕಾಮಗಾರಿಗೆ ರೂ.75 ಲಕ್ಷ ಮಂಜೂರಾಗಿದ್ದು ಗುದ್ದಲಿ ಪೂಜೆಯನ್ನು ಜ.25 ರಂದು ನೆರವೇರಿಸಲಾಯಿತು. ಬಳಿಕ ಅಲ್ಲಿಂದ ಬಡ್ಡಡ್ಕ ಕೂರ್ನಡ್ಕ ರಸ್ತೆಯ ಮಧ್ಯೆ ಆಡಿಂಜ ಎಂಬಲ್ಲಿ ಶಿಥಿಲಾವಸ್ಥೆಯಲ್ಲಿದ್ದ ಮುಳುಗು ಸೇತುವೆಯನ್ನು ತೆರವುಗೊಳಿಸಿ ಹೊಸ ಸೇತುವೆ ನಿರ್ಮಿಸಲು ರೂ.25 ಲಕ್ಷ ಮಂಜೂರುಗೊಳಿಸಿದ್ದು ಕಾಮಗಾರಿಗೆ ತೆಂಗಿನಕಾಯಿ ಒಡೆದು ಗುದ್ದಲಿ ಪೂಜೆಯನ್ನು ನೆರವೇರಿಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಶಾಸಕರು ಸುಳ್ಯ ವಿಧಾನಸಭಾ ಕ್ಷೇತ್ರಕ್ಕೆ ಒಟ್ಟು ರೂ.8 ಕೋಟಿ ಅನುದಾನ ಬಿಡುಗಡೆಯಾಗಿದ್ದು ಪ್ರಥಮ ಆದ್ಯತೆಯಲ್ಲಿ ಆಲೆಟ್ಟಿ ಗ್ರಾಮಕ್ಕೆ 1 ಕೋಟಿ ನೀಡಲಾಗಿದೆ. ಕಾಮಗಾರಿ ನಡೆಯುವ ಸಂದರ್ಭದಲ್ಲಿ ನಾಗರಿಕರು ಹೊಂದಾಣಿಕೆ ಮಾಡಿಕೊಂಡು ಸಹಕರಿಸಬೇಕು ಎಂದು‌ ಹೇಳಿದರು.
ನಾರ್ಕೋಡು ದ್ವಾರದಿಂದ ಬಡ್ಡಡ್ಕ ಸಂಪರ್ಕದ ಅಂತರ್ ರಾಜ್ಯ ರಸ್ತೆಯ ಉಳಿದ ಭಾಗದ 4 ಕಿ.ಮೀ.ರಸ್ತೆಯ ಕಾಮಗಾರಿ ಕೆಲಸವನ್ನು ಶೀಘ್ರವಾಗಿ ಪೂರೈಸುವಂತೆ ಸ್ಥಳೀಯರು ಬೇಡಿಕೆ ಇರಿಸಿದರು.

ವೈಜ್ಞಾನಿಕವಾಗಿ
ಸೇತುವೆ ಕಾಮಗಾರಿ ನಿರ್ವಹಿಸುವುದರಿಂದ ಸ್ವಲ್ಪ ಕಾಲಾವಕಾಶ ಬೇಕಾಗುವುದು. ಕಾಮಗಾರಿ ಕೆಲಸವು 3-4 ತಿಂಗಳ ಅವಧಿಯಲ್ಲಿ ಪೂರ್ಣಗೊಳಿಸಲಾಗುವುದು. ಸೇತುವೆಯ ಒಂದು ಬದಿಯಲ್ಲಿ ವಾಹನ ಸಂಚಾರಕ್ಕೆ ಅವಕಾಶ ಕಲ್ಪಿಸಿಕೊಡಲಾಗುವುದು ಎಂದು ಗುತ್ತಿಗೆದಾರ ಸಂತೋಷ್ ರವರು ತಿಳಿಸಿದರು.