ಪೆಟ್ರೋಲ್ ಬಂಕ್ ನ ಸಿಬ್ಬಂದಿಗಳು ನೀಡಿದ ಮಾಹಿತಿ ಮೇರೆಗೆ ವಾರಿಸುದಾರರಿಗೆ ಒಪ್ಪಿಸಿದ ಸುಳ್ಯ ಪೊಲೀಸರು
ಸುಳ್ಯ :ಪೇಟೆಗೆ ಬಂದ ವ್ಯಕ್ತಿ ಮದ್ಯಪಾನ ಸೇವಿಸಿ ತಾನು ಬಂದಿದ್ದ ಬೈಕನ್ನು ನಿಲ್ಲಿಸಿದ್ದ ಸ್ಥಳ ಮರೆತು ಹೋಗಿದ್ದು, ಸ್ಥಳೀಯ ಪೆಟ್ರೋಲ್ ಬಂಕ್ ಸಿಬ್ಬಂದಿಗಳು ನೀಡಿದ ಮಾಹಿತಿ ಮೇರೆಗೆ ಸುಳ್ಯ ಪೊಲೀಸರು ವಾರಿಸುದಾರಿಗೆ ಬೈಕ್ ಒಪ್ಪಿಸಿದ ಘಟನೆ ಮೇ 26 ರಂದು ನಡೆದಿದೆ.
ಖಾಸಗಿ ಬಸ್ಸು ನಿಲ್ದಾಣದ ಬಳಿ ಇರುವ ಪೆಟ್ರೋಲ್ ಬಂಕ್ ಬಳಿ ಅಪರಿಚಿತ ಬೈಕ್ಕೊಂದು ಎರಡು ದಿನಗಳಿಂದ ನಿಂತಿರುವುದು ಅಲ್ಲಿಯ ಸಿಬ್ಬಂದಿಗಳಿಗೆ ಕಂಡು ಬಂದಿದೆ.ಈ ವಿಷಯವನ್ನು ಸಿಬ್ಬಂದಿಗಳು ಸುಳ್ಯ ಪೊಲೀಸರಿಗೆ ತಿಳಿಸಿದ್ದು, ಸ್ಥಳಕ್ಕೆ ಬಂದ ಪೊಲೀಸರು ಪರಿಶೀಲಿಸಿ ಬೈಕ್ ನ ರಿಜಿಸ್ಟರ್ ನಂಬರ್ ನ ವಾರಿಸುದಾರರ ವಿಳಾಸ ಸಂಗ್ರಹಿಸಿದಾಗ ಕುಡಿದ ಅಮಲಿನಲ್ಲಿ ಬೈಕ್ ನಿಲ್ಲಿಸಿದ್ದ ಜಾಗ ಮರೆತು ಹೋಗಿರುವ ವಿಷಯ ಬೆಳಕಿಗೆ ಬಂದಿದೆ.
ಬಳಿಕ ಅವರನ್ನು ಠಾಣೆಗೆ ಕರೆಸಿ ಬೈಕನ್ನು ಅವರಿಗೆ ಒಪ್ಪಿಸಿದ್ದಾರೆ ಎಂದು ತಿಳಿದು ಬಂದಿದೆ.
