ಇಪ್ಪತ್ತೈದು ಸಾವಿರ ಮೌಲ್ಯದ ನೂರು ಮಣ್ಣಿನ ಮಡಿಕೆ ಕಳವು – ಪೊಲೀಸ್ ದೂರು
ಅಂಗಡಿಯ ಹೊರಗೆ ಮಾರಾಟಕ್ಕಿರಿಸಿದ್ದ ಮಣ್ಣಿನ ಮಡಿಕೆಗಳನ್ನು ರಾತ್ರಿಯ ವೇಳೆ ಕಳ್ಳರು ಕಳವುಗೈದ ಘಟನೆ ದ.ಕ. ಸಂಪಾಜೆ ಗ್ರಾಮದ ಕಲ್ಲುಗುಂಡಿಯಲ್ಲಿ ಅ.24ರಂದು ರಾತ್ರಿ ಸಂಭವಿಸಿದೆ.
ಕಲ್ಲುಗುಂಡಿ ಮೇಲಿನ ಪೇಟೆಯ ವಿಷ್ಣುಮೂರ್ತಿ ಗದ್ದೆಯ ಬಳಿಯಲ್ಲಿ ಯಶೋದಾ ಬಂಗ್ಳೆಗುಡ್ಡೆ ಎಂಬವರು ತಮ್ಮ ಜೀವನೋಪಾಯಕ್ಕಾಗಿ ಕ್ಯಾಂಟೀನ್ ನಡೆಸುತ್ತಾ ಮಣ್ಣಿನ ಮಡಿಕೆಗಳನ್ನು ತಂದಿರಿಸಿ ಮಾರಾಟ ಮಾಡುತ್ತಿದ್ದರು.
ಪ್ರತಿನಿತ್ಯ ರಾತ್ರಿ ಕ್ಯಾಂಟೀನ್ ಪಕ್ಕದಲ್ಲಿ ಮಡಿಕೆಗಳನ್ನು ಟರ್ಪಲ್ ಮುಚ್ಚಿ ಇಡುತ್ತಿದ್ದರೆನ್ನಲಾಗಿದೆ.
ಅ. 24ರಂದು ಬೆಳಿಗ್ಗೆ ಯಶೋದಾ ಅವರು ಇಪ್ಪತ್ತೈದು ಸಾವಿರ ಮೌಲ್ಯದ ನೂರು ಮಣ್ಣಿನ ಮಡಿಕೆಗಳನ್ನು ಖರೀದಿಸಿ, ಮಾರಾಟಕ್ಕೆ ಇರಿಸಿದ್ದರು. ಆದರೆ ರಾತ್ರಿಯ ವೇಳೆ ಅಂಗಡಿ ಹೊರಗೆ ಇರಿಸಿದ್ದ ಸುಮಾರು 25 ಸಾವಿರ ರೂ. ಮೌಲ್ಯದ ನೂರು ಮಣ್ಣಿನ ಮಡಿಕೆಗಳನ್ನು ಕಳ್ಳರು ಕಳವುಗೈದಿರುವುದಾಗಿ ತಿಳಿದುಬಂದಿದೆ.
ಈ ಬಗ್ಗೆ ಯಶೋದಾ ಅವರು ಕಲ್ಲುಗುಂಡಿ ಪೊಲೀಸ್ ಹೊರಠಾಣೆಯಲ್ಲಿ ದೂರು ನೀಡಿದ್ದು, ಪೊಲೀಸರು ಸ್ಥಳಕ್ಕೆ ಆಗಮಿಸಿ , ಸ್ಥಳೀಯ ಅಂಗಡಿಯ ಸಿ.ಸಿ. ಕ್ಯಾಮರಾ ಪರಿಶೀಲನೆ ನಡೆಸಿರುವುದಾಗಿ ತಿಳಿದುಬಂದಿದೆ.
