ಸೊಳ್ಳೆಯಿಂದ ಬರುವ ಕಾಯಿಲೆಯ ಬಗ್ಗೆ ನಿಮಗೆ ತಿಳಿದಿದೆಯಾ..?
ರೋಮ್‌ ಸಾಮ್ರಾಜ್ಯದ ಪತನಕ್ಕೆ ಕಾರಣ ಸೊಳ್ಳೆಯ ಬಗ್ಗೆ ನಿಮಗೆ ಗೊತ್ತಾ…?
ಮಾರಣಾಂತಿಕ ಕಾಯಿಲೆಗಳನ್ನು ಹರಡುವ ಮಹಾಮಾರಿ ಸೊಳ್ಳೆಗಳ ಬಗ್ಗೆ ಜನರಲ್ಲಿ ಅರಿವು ಮೂಡಿಸುವ ಸಲುವಾಗಿ ಪ್ರತಿ ವರ್ಷ ಆಗಸ್ಟ್ 20 ರಂದು ವಿಶ್ವ ಸೊಳ್ಳೆ ದಿನವನ್ನ ಆಚರಣೆ ಮಾಡಲಾಗುತ್ತದೆ. ಪ್ರತಿ ವರ್ಷ ಸೊಳ್ಳೆಗಳಿಂದ ಹರಡುವ ರೋಗಗಳಿಂದ ಸುಮಾರು ಐದು ಲಕ್ಷ ಜನರು ಸಾವನ್ನಪ್ಪುತ್ತಿರುವ ವಿಚಾರದ ಬಗ್ಗೆ ನಿಮಗೆ ತಿಳಿದಿದೆಯಾ..??
ಇಂದು ವಿಶ್ವ ಸೊಳ್ಳೆ ದಿನ. ಸೊಳ್ಳೆಗಳಿಂದ ಎದುರಾಗುವ ಅಪಾಯ ಮತ್ತು ರೋಗಗಳ ಕುರಿತು ಜಾಗೃತಿ ಮೂಡಿಸುವ ಸಲುವಾಗಿ ಪ್ರತಿ ವರ್ಷ ಆಗಸ್ಟ್ 20 ರಂದು ವಿಶ್ವ ಸೊಳ್ಳೆ ದಿನವನ್ನು ಆಚರಣೆ ಮಾಡಲಾಗುತ್ತದೆ.ಸೊಳ್ಳೆ ಎಂದರೆ ತಕ್ಷಣ ಕೆಲವರಿಗೆ ಕಿರಿಕಿರಿ ಇನ್ನೂ ಕೆಲವರಿಗೆ ಭಯ. ರಾತ್ರಿ, ಹಗಲು ಎನ್ನದೇ ಮಲಗಲು ಬಿಡದೆ ಕಿವಿಯ ಬಳಿ ಗುಂಯ್‌ ಗುಡುತ್ತಿದ್ದರೆ ಎಂತವರಿಗೂ ಕೋಪ ನೆತ್ತಿಗೇರುತ್ತದೆ. ಸೊಳ್ಳೆಯನ್ನು ಒಡಿಸಲು ಎಷ್ಟೋ ಹರಸಾಹಸ ಮಾಡಿದರು ಕೆಲವೊಮ್ಮೆ ಅದು ವರ್ಕೌಟ್‌ ಆಗಲ್ಲ. ಆಗ ಮನುಷ್ಯನನ್ನು ಸಿಟ್ಟಿಗೆರಿಸುವುದಂತು ನಿಜ.
ಸೊಳ್ಳೆಗಳು ಕಿರಿಕಿರಿ ಉಂಟು ಮಾಡುವುದು ಮಾತ್ರವಲ್ಲದೆ ಬಹಳ ಅಪಾಯಕಾರಿ ಕೂಡಾ ಹೌದು. ಸೊಳ್ಳೆಗಳು ಹಲವು ರೋಗಗಳಿಗೆ ಕಾರಣವಾಗಬಹುದು. ಅದರಲ್ಲೂ ದೊಡ್ಡ ದೊಡ್ಡ ರೋಗಗಳಾದ ಮಲೇರಿಯಾ, ಚಿಕನ್‌ಗುನ್ಯಾ, ಡೆಂಗ್ಯೂ, ಝೀಕಾ ವೈರಸ್, ಹಳದಿ ಜ್ವರ ಮುಂತಾದ ರೋಗಗಳು ಬರುವುದು ಸೊಳ್ಳೆಗಳಿಂದ. ಪ್ರತಿ ವರ್ಷ ಸೊಳ್ಳೆಗಳಿಂದ ಹರಡುವ ರೋಗಗಳಿಂದ ಸುಮಾರು ಐದು ಲಕ್ಷ ಜನರು ಸಾವನ್ನಪ್ಪುತ್ತಿದ್ದಾರೆ.
ಇದಕ್ಕಾಗಿಯೇ ಪ್ರತಿ ವರ್ಷ ವಿಶ್ವ ಸೊಳ್ಳೆ ದಿನವನ್ನು ಆಚರಣೆ ಮಾಡಲಾಗುತ್ತದೆ. ಮಾರಣಾಂತಿಕ ಕಾಯಿಲೆಗಳನ್ನು ಹರಡುವ ಮಹಾಮಾರಿ ಸೊಳ್ಳೆಗಳ ಬಗ್ಗೆ ಜನರಲ್ಲಿ ಅರಿವು ಮೂಡಿಸುವ ಸಲುವಾಗಿ ಪ್ರತಿ ವರ್ಷ ಆಗಸ್ಟ್ 20 ರಂದು ವಿಶ್ವ ಸೊಳ್ಳೆ ದಿನವನ್ನ ಆಚರಣೆ ಮಾಡಲಾಗುತ್ತದೆ.
ಭಾರತೀಯ ಮೂಲದ ಬ್ರಿಟನ್‌ ವೈದ್ಯ ರೊನಾಲ್ಡ್‌ ರಾಸ್‌ ಅವರು ಮನುಷ್ಯನಿಂದ ಮನುಷ್ಯನಿಗೆ ಮಲೇರಿಯಾ ಹರಡಲು ಅನಾಫಿಲೀಸ್‌ ಎಂಬ ಹೆಣ್ಣು ಸೊಳ್ಳೆಯೇ ಕಾರಣ ಎಂಬ ವಿಷಯವನ್ನು ಕಂಡು ಹಿಡಿದಿದ್ದು 1897ರ ಆಗಸ್ಟ್ 20ರಂದೇ. ಹೀಗಾಗಿ ಈ ಸಂಶೋಧನೆಯ ನೆನಪಾಗಿಯೂ ಸೊಳ್ಳೆ ದಿನ ಆಚರಿಸಲಾಗುತ್ತದೆ. ರೊನಾಲ್ಡ್‌ ರಾಸ್‌ 1902 ರಲ್ಲೇ ವಿಶ್ವ ಸೊಳ್ಳೆ ದಿನ ಎಂದು ಮೊದಲ ಬಾರಿಗೆ ಘೋಷಿಸಿದರು. ಅಂದಿನಿಂದ ಪ್ರತಿ ವರ್ಷ ವಿಶ್ವ ಸೊಳ್ಳೆ ದಿನವನ್ನು ಆಚರಣೆ ಮಾಡಲಾಗುತ್ತಿದೆ. ಈ ದಿನದಂದು ಸೊಳ್ಳೆ ವಿರುದ್ಧ ಜನಜಾಗೃತಿ ಮೂಡಿಸುವ ಕೆಲಸ ಆಗುತ್ತಿದೆ.
“ಲಂಡನ್‌ ಸ್ಕೂಲ್‌ ಆಫ್‌ ಹೈಜಿನ್‌ ಆಂಡ್‌ ಟ್ರಾಪಿಕಲ್‌ ಮೆಡಿಸಿನ್‌” ಸಂಸ್ಥೆಯು ಪ್ರತಿವರ್ಷ ಸೊಳ್ಳೆ ದಿನವನ್ನು ಆಯೋಜಿಸುತ್ತದೆ. ಸುಮಾರು 1930ರ ಕಾಲದಿಂದಲೂ ಪ್ರದರ್ಶನಗಳು, ಜಾಗೃತಿ ಅಭಿಯಾನಗಳ ಮೂಲಕ ಈ ಸಂಸ್ಥೆ ಸೊಳ್ಳೆ ದಿನವನ್ನು ಆಚರಿಸಿಕೊಂಡು ಬರುತ್ತಿದೆ.
ಮಲೇರಿಯಾ ರೋಗವು ಸೊಳ್ಳೆಗಳಿಂದ ಹರಡುತ್ತದೆ. ಸೊಳ್ಳೆಯಿಂದ ಹರಡುವ ಮಲೇರಿಯಾ ರೋಗ ಇತಿಹಾಸದಲ್ಲೇ ಮಾರಕ ಕಾಯಿಲೆ ಎಂದು ಹೇಳಲಾಗುತ್ತದೆ. ಮಲೇರಿಯಾ ಕೊರೊನಾ ರೋಗಕ್ಕಿಂತ ಅಪಯಾಕಾರಿ ಎನ್ನಲಾಗಿದೆ. ಇತ್ತೀಚಿನ ಮಾಹಿತಿಯ ಪ್ರಕಾರ, ಪ್ರತಿ ವರ್ಷ 435,000 ಜನರು ಮಲೇರಿಯಾದಿಂದ ಸಾಯುತ್ತಾರಂತೆ. ಇದಲ್ಲದೆ, ಪ್ರಪಂಚದಲ್ಲಿ ವರ್ಷಕ್ಕೆ 219 ಮಿಲಿಯನ್ ಮಲೇರಿಯಾ ಪ್ರಕರಣಗಳ ದಾಖಲಾಗುತ್ತವೆ ಎಂದು ಅಂದಾಜಿಸಲಾಗಿದೆ. ಈ ಅಂಕಿಅಂಶಗಳನ್ನು ನೋಡಿದ ಮೇಲೆ ಗೋತ್ತಾಗುತ್ತದೆ ಸೊಳ್ಳೆ ಎಷ್ಟು ಅಪಯಾಕಾರಿ ಕೀಟ ಎಂದು.
ಜಗತ್ತಿನಲ್ಲಿ ಅತಿ ಕ್ರೂರ ಪ್ರಾಣಿ ಎಂದರೆ ಹುಲಿ, ಸಿಂಹ, ಚಿರತೆ ಎಂದು ಹೇಳಲಾಗುತ್ತದೆ. ಈ ಕ್ರೂರ ಪ್ರಾಣಿಗಳಿಗಿಂತ ಸೊಳ್ಳೆ ಹೆಚ್ಚು ಅಪಾಯಕಾರಿ ಎಂದರೆ ನೀವು ನಂಬಲೆಬೇಕು. ಅದರಲ್ಲೂ ಹೆಣ್ಣು ಸೊಳ್ಳೆಗಳು ಹೆಚ್ಚು ಡೇಂಜರಸ್‌. ವಿಶ್ವದಲ್ಲಿ ಇದುವರೆಗೂ ಸುಮಾರು ನಾಲ್ಕುವರೆ ಕೋಟಿ ಜನರು ಸೊಳ್ಳೆ ಕಡಿತದಿಂದ ಉಂಟಾದ ವಿವಿಧ ರೋಗಗಳಿಗೆ ಬಲಿಯಾಗಿದ್ದಾರೆ. ಇಂದಿಗೂ ವಿಶ್ವದಲ್ಲಿ ಪ್ರತಿ ಹನ್ನೆರಡು ಸೆಕೆಂಡುಗಳಿಗೆ ಒಬ್ಬ ವ್ಯಕ್ತಿ ಸೊಳ್ಳೆಯಿಂದ ಸಾಯುತ್ತಿದ್ದಾರೆ. ಭೂಮಿಯ ಮೇಲಿನ ಇತರ ಯಾವುದೇ ಪ್ರಾಣಿಗಳ ಕಾಟದಿಂದ ಇಷ್ಟು ದೊಡ್ಡ ಪ್ರಮಾಣದಲ್ಲಿ ಮನುಷ್ಯರು ಸಾವನ್ನಪ್ಪಿಲ್ಲ.
ಸೊಳ್ಳೆಯ ಇಂಗ್ಲಿಷ್‌ ಹೆಸರಾದ “ಮಸ್ಕಿಟೊ” ಪದದ ಮೂಲ ಸ್ಪ್ಯಾನಿಷ್‌. ಸ್ಪ್ಯಾನಿಷ್‌ನಲ್ಲಿ ಇದರ ಮೂಲ ಅರ್ಥ “ಚಿಕ್ಕ ಕೀಟ” ಎಂದರ್ಥ. ಸೊಳ್ಳೆಗಳು 10 ರಿಂದ 50 ಮೀಟರ್‌ ದೂರದಿಂದ ಮನುಷ್ಯನ ಉಸಿರಾಟವನ್ನು ಗುರುತಿಸಬಲ್ಲವು. 5-10 ಮೀಟರ್‌ ವ್ಯಾಪ್ತಿಯಲ್ಲಿ ಮನುಷ್ಯನನ್ನು ನೋಡಬಲ್ಲವು. 20 ಸೆಂ.ಮೀಟರ್‌ ವ್ಯಾಪ್ತಿಯಲ್ಲಿ ಮನುಷ್ಯನ ದೇಹದ ಉಷ್ಣತೆ ಮತ್ತು ಬೆವರನ್ನು ಗ್ರಹಿಸಬಲ್ಲ ಶಕ್ತಿ ಸೊಳ್ಳೆಗಳಿಗಿದೆ.
ಮಲೇರಿಯಾ, ಹಳದಿ ಜ್ವರ, ಡೆಂಘಿ, ಎನ್ಸಾಫಲಿಟಿಸ್‌ (ಮೆದುಳಿನ ಉರಿಯೂತ), ಆನೆ ಕಾಲು ರೋಗ, ಜೀಕಾ ವೈರಸ್ ಸೇರಿದಂತೆ ನೂರಕ್ಕೂ ಹೆಚ್ಚು ಮಾರಕ ರೋಗಗಳನ್ನು ಈ ಹೆಣ್ಣು ಸೊಳ್ಳೆಗಳು ಒಬ್ಬರಿಂದ ಒಬ್ಬರಿಗೆ ಹರಡುತ್ತಾ ಸಾವಿಗೆ ಕಾರಣವಾಗುತ್ತವೆ.
ವಿಶ್ವ ಇತಿಹಾಸತದ ಪ್ರಮುಖ ಸಾಮ್ರಾಜ್ಯಗಳಲ್ಲಿ ಒಂದು ರೋಮನ್ ಸಾಮ್ರಾಜ್ಯ. ಈ ರೋಮನ್ ಸಾಮ್ರಾಜ್ಯದ ಪತನಕ್ಕೆ ಈ ಸೊಳ್ಳೆಗಳು ಕಾರಣವಾಗಿದ್ದವು ಎಂದರೆ ನಂಬಲೇಬೇಕು. ರೋಮ್‌ ಸಾಮ್ರಾಜ್ಯ ಪತನಕ್ಕೆ ಮೂಲ ಕಾರಣ ಮಲೇರಿಯಾ ರೋಗ ಎನ್ನಲಾಗಿದೆ. ಆಫ್ರಿಕಾದಿಂದ ಇದು ಯುರೋಪ್ ಖಂಡದ ರೋಮ್‌ಗೆ ಈ ರೋಗ ಹರಡಿತ್ತು. ಆಗ ರೋಮ್‌ನ ಅನೇಕ ಜನರು ಈ ಮಲೇರಿಯಾ ರೋಗಕ್ಕೆ ತುತ್ತಾಗಿ ಪ್ರಾಣ ಕಳೆದುಕೊಂಡರು ಎನ್ನಲಾಗಿದೆ. ಆಗ ಈ ಕಾಯಿಲೆಯನ್ನು ರೋಮನ್ ಫಿವರ್ ಎಂದು ಕರೆಯಲಾಗಿತ್ತು ಎನ್ನಲಾಗಿದೆ.
