ಕೊಯನಾಡಿನಿಂದ ಸುಳ್ಯಕ್ಕೆ ಕೆ.ಎಸ್.ಆರ್.ಟಿ.ಸಿ. ವತಿಯಿಂದ ಸೆಟ್ಲ್ ಬಸ್ ವ್ಯವಸ್ಥೆಯಿದ್ದು, ಈ ಬಸ್ ಪ್ರಯಾಣಿಕರ ತಂಗುದಾಣ ಮಾತ್ರವಲ್ಲದೇ, ಹೆಚ್ಚು ಜನರು ಇರುವ ಎಲ್ಲಾ ಕಡೆಗಳಲ್ಲಿ ನಿಲ್ಲುವಂತೆ ವ್ಯವಸ್ಥೆ ಕಲ್ಪಿಸಿಕೊಡಬೇಕೆಂದು ಸಂಪಾಜೆಯ ಕಡೆಪಾಲದ ನಿವಾಸಿಗಳು ಸುಳ್ಯ ಕೆ.ಎಸ್.ಆರ್.ಟಿ.ಸಿ. ಗೆ ಮನವಿ ಸಲ್ಲಿಸಿದ್ದಾರೆ.
ಈ ಮೊದಲು ಪ್ರಯಾಣಿಕರ ತಂಗುದಾಣ ಮಾತ್ರವಲ್ಲದೆ ಜನರು ಇರುವ ಎಲ್ಲಾ ಕಡೆಗಳಲ್ಲಿ ಸೆಟ್ಲ್ ಬಸ್ ನಿಲ್ಲುತ್ತಿತ್ತು. ಆದರೆ ಇತ್ತೀಚೆಗೆ ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣ ಆದ ಬಳಿಕ ಎಲ್ಲಾ ಕಡೆಗಳಲ್ಲಿ ಬಸ್ ನಿಲ್ಲಿಸುತ್ತಿಲ್ಲ. ಇದರಿಂದಾಗಿ ಗ್ರಾಮೀಣ ಪ್ರದೇಶದಿಂದ ಶಾಲಾ ಕಾಲೇಜುಗಳಿಗೆ ತೆರಳುವ ವಿದ್ಯಾರ್ಥಿಗಳು ಸೇರಿದಂತೆ ಸಾರ್ವಜನಿಕರಿಗೆ ತೊಂದರೆಯಾಗಿದ್ದು, ಈ ಮೊದಲಿನಂತೆ ಸುಳ್ಯ – ಕೊಯನಾಡು ಕೆ.ಎಸ್.ಆರ್.ಟಿ.ಸಿ. ಬಸ್ ಎಲ್ಲಾ ಕಡೆಗಳಲ್ಲಿ ನಿಲ್ಲುವಂತೆ ಕ್ರಮಕೈಗೊಳ್ಳಬೇಕಾಗಿ ಮನವಿಯಲ್ಲಿ ಉಲ್ಲೇಖಿಸಲಾಗಿದೆ ಎಂದು ತಿಳಿದುಬಂದಿದೆ.
ಈ ಸಂದರ್ಭದಲ್ಲಿ ಕಡೆಪಾಲ ನಿವಾಸಿಗಳಾದ ಪುಷ್ಪಲತಾ ಕೆ., ಲಿಟ್ಟಿ ಜೋಸ್, ಕುಸುಮ, ಶೈಮಾ ಹಾಗೂ ಇನ್ನಿತರ ಸುಮಾರು ಇಪ್ಪತ್ತು ಜನ ಮಂದಿ ಮಹಿಳೆಯರು ಉಪಸ್ಥಿತರಿದ್ದು, ಮನವಿ ಸಲ್ಲಿಸಿದರು.
