ಸುದ್ದಿ ಅರಿವು ಕೇಂದ್ರದಿಂದ ನಡೆಯುತ್ತಿರುವ ನಮ್ಮ ಊರು -ನಮ್ಮ ಹೆಮ್ಮೆ ಅಭಿಯಾನದ ಅಂಗವಾಗಿ ಜಾಲ್ಸೂರು ಪಯಸ್ವಿನಿ ಪ್ರೌಢಶಾಲೆಗೆ ದಾನಿಗಳಿಂದ ಕೊಡುಗೆ ಹಸ್ತಾಂತರ ಕಾರ್ಯಕ್ರಮ ಜ. 28 ರಂದು ಶಾಲೆಯಲ್ಲಿ ನಡೆಯಿತು.
ಅರೆಭಾಷೆ ಅಕಾಡೆಮಿಯ ವತಿಯಿಂದ ಶಾಲಾ ಗ್ರಂಥಾಲಯಕ್ಕೆ ನೀಡಿದ ಅರೆಭಾಷೆ ಪುಸ್ತಕಗಳನ್ನು ಅಕಾಡೆಮಿ ಅಧ್ಯಕ್ಷ ಸದಾನಂದ ಮಾವಜಿ ಗ್ರಂಥಾಲಯಕ್ಕೆ ಹಸ್ತಾಂತರಿಸಿದರು.
ಸಂಸ್ಥೆಯ ಹಿರಿಯ ವಿದ್ಯಾರ್ಥಿ, ಪ್ರಸ್ತುತ ವಿದೇಶದಲ್ಲಿ ಉದ್ಯೋಗ ಮಾಡುತ್ತಿರುವ ಮೋಹನ ಕಾಳಮ್ಮನೆಯವರು ಶಾಲೆಗೆ ನೀಡಿದ ಕಪಾಟನ್ನು ಅವರ ತಂದೆ ಜೆ.ಕೆ.ರಮೇಶ್ ಗೌಡ ಕಾಳಮ್ಮನೆ, ಸುಳ್ಯ ರೋಟರಿ ಕ್ಲಬ್ ಅಧ್ಯಕ್ಷೆ ಶ್ರೀಮತಿ ಯೋಗಿತಾ ಗೋಪಿನಾಥ್ ರವರ ನೇತೃತ್ವದಲ್ಲಿ ಶಾಲೆಗೆ 5 ಫ್ಯಾನ್, ಶಾಲೆಯ ಆಡಳಿತ ನಿರ್ದೇಶಕರಾಗಿ ಸೇವೆ ಸಲ್ಲಿಸಿ ಇತ್ತೀಚಿಗೆ ನಿಧನ ಹೊಂದಿದ ಇಬ್ರಾಹಿಂ ಕತಾರ್ ರವರ ನೆನಪಿನಲ್ಲಿ ಅವರ ಮನೆಯವರು ಶಾಲೆಗೆ ಊಟದ ಬಟ್ಟಲು ಇಡಲು ಸ್ಟ್ಯಾಂಡ್ ಕೊಡುಗೆಯಾಗಿ ಹಸ್ತಾಂತರಿಸಿದರು.
ಶಾಲಾ ಸಂಚಾಲಕ ಜಾಕೆ ಸದಾನಂದ ಅಧ್ಯಕ್ಷತೆ ವಹಿಸಿ ಶುಭ ಹಾರೈಸಿದರು.
ವೇದಿಕೆಯಲ್ಲಿ ಶಾಲಾ ಆಡಳಿತ ಮಂಡಳಿ ಅಧ್ಯಕ್ಷ ಅಡ್ಡಂತಡ್ಕ ದೇರಣ್ಣ ಗೌಡ, ಸುದ್ದಿ ಕಚೇರಿ ವ್ಯವಸ್ಥಾಪಕ ಯಶ್ವಿತ್ ಕಾಳಮ್ಮನೆ, ಶಾಲಾ ಮುಖ್ಯ ಶಿಕ್ಷಕಿ ಶ್ರೀಮತಿ ಜಯಲತಾ ಉಪಸ್ಥಿತರಿದ್ದರು.
ದಾನಿಗಳನ್ನು ಹಾಗೂ ದಾನಿಗಳ ಮುಖಾಂತರ ಕೊಡುಗೆ ಹಸ್ತಾಂತರ ಮಾಡುವಲ್ಲಿ ಪ್ರಮುಖ ಪಾತ್ರ ವಹಿಸಿದ ಯಶ್ವಿತ್ ಕಾಳಮ್ಮನೆಯವರನ್ನು ಶಾಲಾ ವತಿಯಿಂದ ಸನ್ಮಾನಿಸಿ ಗೌರವಿಸಲಾಯಿತು.
ಇದೇ ಸಂದರ್ಭ ಸುಳ್ಯ ಪಿಎಲ್‌ಡಿ ಬ್ಯಾಂಕ್‌ನ ಅಧ್ಯಕ್ಷರಾಗಿ ಆಯ್ಕೆಯಾದ ಸಂಸ್ಥೆಯ ನಿರ್ದೇಶಕ ಜಯರಾಮ ರೈ ಜಾಲ್ಸೂರುರವರನ್ನು ಗೌರವಿಸಿಲಾಯಿತು.
ಶಾಲಾ ಶಿಕ್ಷಕ ಶಿವಪ್ರಕಾಶ್ ಕುದ್ಪಾಜೆ ಕಾರ್ಯಕ್ರಮ ನಿರ್ವಹಿಸಿದರು. ಶಿಕ್ಷಕಿ ಮೀನಾಕುಮಾರಿ ವಂದಿಸಿದರು.
ಪಯಸ್ವಿನಿ ಎಜುಕೇಶನ್ ಸೊಸೈಟಿಯ ಖಜಾಂಜಿ ಶ್ರೀನಿವಾಸ ಭಟ್, ರೋ.ಗೋಪಿನಾಥ್ ಬೊಳುಬೈಲು, ಲ.ಶ್ರೀಮತಿ ರೇಣುಕಾ ಸದಾನಂದ ಜಾಕೆ, ಸುದ್ದಿ ಬಿಡುಗಡೆ ಪತ್ರಿಕೆ ಮುಖ್ಯ ವರದಿಗಾರ ಶಿವಪ್ರಸಾದ್ ಕೇರ್ಪಳ, ಜಾಹೀರಾತ್ ವಿಭಾಗ ಮುಖ್ಯಸ್ಥ ರಮೇಶ್ ನೀರಬಿದಿರೆ, ಶ್ರೀಮತಿ ರೇವತಿ ರಮೇಶ ಕಾಳಮ್ಮನೆ, ಶ್ರೀಮತಿ ಭಾರತಿ ಜಯಂತ ಕಾಳಮ್ಮನೆ ಮೊದಲಾದವರು ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.
ಶಾಲಾ ಶಿಕ್ಷಕ ವೃಂದ, ಬೋಧಕೇತರ ವೃಂದ, ವಿದ್ಯಾರ್ಥಿಗಳು ಸಹಕರಿಸಿದರು.
ಸಿ.ಸಿ. ಕ್ಯಾಮರಾ ಘೋಷಿಸಿದ ದೇರಣ್ಣ ಗೌಡ
ಸಭೆಯಲ್ಲಿ ಉಪಸ್ಥಿತರಿದ್ದ ಅಡ್ಡಂತಡ್ಕ ದೇರಣ್ಣ ಗೌಡರು, “ಶಾಲೆಯ ಭದ್ರತೆಯ ನಿಟ್ಟಿನಲ್ಲಿ ಎರಡು ಸಿಸಿ ಕ್ಯಾಮರಾಗಳ ವ್ಯವಸ್ಥೆ ಆಗಬೇಕಾಗಿದ್ದು, ಒಂದು ಕ್ಯಾಮರಾ ವನ್ನು ನಾನು ನೀಡುತ್ತೇನೆ. ಇನ್ನೊಂದು ಕ್ಯಾಮರಾ ನೀಡಲು ದಾನಿಗಳು ಮುಂದೆ ಬರಬೇಕು ಎಂದು ಹೇಳಿದರಲ್ಲದೆ, ನಮ್ಮ ಸಂಸ್ಥೆಗೆ ಎರಡೂವರೆ ಎಕ್ರೆ ಜಾಗ ಇದೆ. ಆದರೆ ಇದು ಶಾಲೆಗೆ ಮಂಜೂರಾಗಲು ಕೆಲಸಗಳು ಆಗಬೇಕಾಗಿದೆ. ಆ ನಿಟ್ಟಿನಲ್ಲಿ ಪ್ರಯತ್ನಗಳು ನಡೆಯುತ್ತಿದೆ ಎಂದು ಹೇಳಿದರು.
ಇನ್ನೊಂದು ಕೊಠಡಿ ಅವಶ್ಯವಿದೆ, ದಾನಿಗಳು ಮುಂದೆ ಬರಬೇಕು : ಜಾಕೆ
ಪಯಸ್ವಿನಿ ಶಾಲೆಗೆ ಈ ದಿನ ಇಷ್ಟು ಕೊಡುಗೆಗಳು ಬರಲು ಸುದ್ದಿಯ ಯಶ್ವಿತ್ ಕಾಳಮ್ಮನೆ ಕಾರಣ. ನಮ್ಮ ಊರು ನಮ್ಮ ಹೆಮ್ಮೆಯಾಗಬೇಕೆಂದು ಅವರು ಶ್ರಮ ವಹಿಸಿದ್ದಾರೆ. ಅದೇ ರೀತಿ ಶಾಲೆಗೆ ಒಂದು ಕೊಠಡಿಯ ಅವಶ್ಯಕತೆ ಇದ್ದು ಆ ಕೊಠಡಿ ಆಗುವಲ್ಲಿ ವಿದೇಶದಲ್ಲಿ ದುಡಿಯುತ್ತಿರುವ ಕಮಲ್ ಸಹಕಾರ ನೀಡಬೇಕು. ವಿದೇಶದಲ್ಲಿರುವ ಜಾಲ್ಸೂರಿನವರ ಹಾಗೂ ದಾನಿಗಳ ಸಹಕಾರವನ್ನು ಅವರು ನಮಗೆ ಕೊಡಿಸುತ್ತಾರೆಂಬ ವಿಶ್ವಾಸ ಇದೆ ಎಂದು ಶಾಲಾ ಸಂಚಾಲಕ ಜಾಕೆ ಸದಾನಂದರು ತಮ್ಮ ಅಧ್ಯಕ್ಷೀಯ ಮಾತಿನಲ್ಲಿ ಹೇಳಿದರು.
